Ei investering i framtida
- Kompetanseheving og etterutdanning til næringslivet er viktig, og utan næringsliv har vi heller ikkje arbeidsplassar, seier Ørjan Skåden frå SpareBank 1 Sogn og Fjordane.
Skåden peikar på at søknaden frå StudieHub treff godt på dei verdiane banken og stiftinga jobbar for. Difor valde dei å bidra med midlar som sikrar vidare drift i eit treårig prosjekt.
Takksame for støtta
Leiar for StudieHub, Kari Eldby Rygg, uttrykte stor takksemd for den viktige etableringsstøtta. Ho understreka at Sparebankstiftinga ser verdien av kunnskap, utdanning og kompetansebygging i regionen.
- De gir oss høve til å skape eit sterkare fundament for livslang læring der folk bur. Dette handlar om bulyst, rekruttering av arbeidskraft, verdiskaping og ikkje minst om å gi folk høve til å utvikle seg - utan å måtte flytte frå heimstaden sin, seier Rygg.
Unik moglegheit for vidare vekst
Med desse midlane får StudieHub moglegheita til å vidareutvikle tilbodet sitt, styrke samarbeidet med utdanningsinstitusjonar og næringsliv, og sikre at kompetansebehova i regionen blir møtt.
- Vi har store ambisjonar, men vi veit at vi ikkje kan gjere dette åleine. Vi treng samarbeid og gode partnarar. Sparebankstiftinga har vist at dei er med på laget, og det betyr enormt mykje for oss, seier Rygg.
Vidare drift sikra
Øystein Nes i Inviro stadfestar at støtta gir eit solid grunnlag for vidare drift av StudieHub dei neste tre åra.
- Vi starta opp i 2022 med den første støtta, og sidan 2023 har vi vore i full drift. Vi arbeidar på vegne av alle Nordfjordkommunane og Sunnfjord kommune, og det siste 1,5 åra har vi hatt rundt 150 studentar innom. Det viser at det er eit stort behov og samstundes eit enormt potensial for dette tilbodet, seier Nes.
StudieHub ser no fram til å vidareutvikle tilbodet sitt og legge til rette for at endå fleire får tilgang til fleksibel og tilpassa utdanning der dei bur.
Vi takkar SpareBank 1 Sogn og Fjordane og Sparebankstiftinga for tilliten og støtta – saman byggjer vi framtida!
